Nótaí a ghabhann leis na Ráitis Airgeadais

19. Iasachtaíochtaí agus Fiachas Eile

Iasachtaíochtaí bainc reatha:

Tá comhaontú déanta ag an gCuideachta le Ulster Bank DAC maidir le saoráid chreidmheasa imrothlaigh ar luach €50m. Cuireadh an tsaoráid sin i bhfeidhm ar bhonn téarma cúig bliana i dtosach báire, agus bhí rogha ann é sin a shíneadh ar feadh dhá thréimhse d’aon bhliain amháin, faoi réir cead ón mbanc. D’fheidhmigh an Chuideachta a rogha le linn 2019 chun an tsaoráid a shíneadh, agus tá sí anois le bheith aisíoctha go hiomlán i Márta 2024. Bhí an tsaoráid gan íostarraingt amhail ag deireadh na bliana (2018: €35m).

Tá an ráta úis ar an iasacht athraitheach ar bhonn an EURIBOR agus ar an gcorrlach is infheidhme. Níl aon urrús inláimhsithe á choimeád ag Banc Uladh i leith na saoráide sin.

Na hiasachtaíochtaí bainc gearrthéarmacha in 2018, tá siad taispeánta glan ó chostais chaipitlithe eisiúna fiachais de €163k, atá le hamúchadh i rith théarma an fhiachais. Meastar go ndéanfar an tsaoráid a íostarraingt arís in 2020, agus ar an ábhar sin, i gcás na gcostas eisiúna fiachais de €112k atá fágtha, tá siad taispeánta i bhfáltais eile (nóta 15).

Iasachtaíochtaí bainc fadtéarmacha:

I Nollaig 2015, rinne an Chuideachta Conradh Maoinithe leis an mBanc Eorpach Infheistíochta i leith saoráid maoinithe tionscadail de €100m. Bhí an tsaoráid sin i bhfeidhm ar feadh téarma 20 bliain agus bhí sí íostarraingthe go hiomlán amhail ag deireadh na bliana. Ba ionann an t-iarmhéid gan íoc agus €98.69m amhail ar an 31 Nollaig 2019 (2018: €100m).

Iasachtaíochtaí socrúcháin phríobháidigh:

I Nollaig 2019, d’eisigh an Chuideachta bannaí sinsearacha neamhurraithe de €300m do réimse infheisteoirí institiúideacha. Eisíodh na bannaí ráta sheasta sin in euro agus tá siad liostaithe ar an Margadh Malairte Domhanda de Euronext Bhaile Átha Cliath. Tiocfaidh na bannaí in aibíocht i Meán Fómhair 2049. Amhail ar an 31 Nollaig 2019, bhí €100m de bhannaí ceannaithe. Tá gealltanas i bhfeidhm go gceannóidh na hinfheisteoirí an €200m atá fágtha de na bannaí, dá dtagraítear bannaí réamhcheannacháin, ar dhátaí sonraithe in 2020 agus 2021. Tá de rogha ag an gCuideachta, áfach, an gealltanas sin a chur ar ceal gan aon chostas agus gan cuid de na bannaí réamhcheannacháin a cheannach, nó gan aon cheann díobh a cheannach.

Anuas air sin, d’eisigh an Chuideachta méid nótaí neamhliostaithe d’fho-ghrúpa infheisteoirí ar phraghas ainmniúil. Is meicníocht mhalartach d’infheisteoirí iad nótaí neamhliostaithe, a chuireann ar a gcumas suibscríobh do na bannaí atá fágtha (in ionad bannaí réamhcheannacháin a cheannach). Amhail ar an 31 Nollaig 2019, bhí €9,000 faighte ag an gCuideachta i ndáil le ceannach nótaí neamhliostaithe.

Tá coinníollacha ag an bhfiachas socrúcháin phríobháidigh agus ag saoráidí eile, a éilíonn ar an gCuideachta cúnaint áirithe a chomhlíonadh. Amhail ar an 31 Nollaig 2019, tá an Chuideachta ag cloí go hiomlán leis na riachtanais uile maidir le cúnaint.